Kawlram le India ram then a rak si cu Mara miphun caah a poi khun ko rua. Kawlram le Indai ram hi then rak si hlah seh law Mara miphun hi a hlan bangin Maraland tiin ram pakhat tein a dir hnga i Chin miphun chungah hin ai tel lem hnga lo. Kawl ram le India ram then a van si hnu ahcun tuanbia ah Miphun ngan deuh pawl nih miphun hme deuh pawl an dolh i an ci an hmih hna bang khan Lai miphun nih Mara miphun cu dolh a vun timh hnik ve. Lai nih Mara miphun hi a dolh kho lai maw? Mara lei kong kan zoh tuah lai.
Mara miphun
Mara miphun cu miphun phunkhat an si. India ram ah khin Halkha khuapi nakin a ngan deuhmi Mara pawl nih an i uang ngaimi an khualipi Saiha a um. India ram, Saiha khua kiangkap ah Mara miphun cu fek thup in hram an bunh i Kawlram Mara pawl zong Saiha lei ah ai thial i khua a sami an tampi cang. Mara miphun i funtomnak ding caah Kawlram Mara, India Mara ti hi hman loin Nichuah Mara le Nithlak Mara tiin an hman. Nitlak lei Mara hi Nichuah lei Mara nakin Milu an tam deuh bantukin a lamkip in an thangcho deuh fawn.
Mara cu ram a ngei maw?
Lai ram le Chinland ti a um bang Mara ram, Maraland ti hi a hlanpi in a rak um cangmi a si. Mara miphun cu a hlan pi in ram a ngeimi miphun a si. Nun phung, thil thuam le lam zong a hlanpi in a rak ngei cangmi Miphun pakhat a si.
Caholh
Mara miphun cu caholh zong tling khit-khat tein a ngeimi miphun a si. Lai miphun nih Lai ca in Baibal ca a ngeih hlanpi ah Mara miphun cu Mara ca tein Baibal ca a rak ngei diam cang. Chinram ah Baibal ca a ngei hmasa bikmi miphun cu Mara miphun a si tiah tuanbia ah fiang tein hmuh khawh a si fawn.
Note:
Mah le tuanbia cu mah nih hngalh bik a si. Lai le Mara kong hi kan ceih tuk lo ah a tha bik lai. Kan theih cio bang hikong ah Chinmi Khat le khat thencheunak le i huatnak lehlam a chuahpi ngai cang. Ruru hranghrang in miphun a daw i a tanhmi pawl hi Chin Miphun thencheutu cu an si theo.
Satu CHIN 