“Chin Miphun Ni” hi “Lai Miphun Ni ” muisam a van keng chin lengmang. Miphun daw thenkhat pawl nih cun
Chin Miphun Ni ah Kawlholh hman nan duh lo i Lai holh thengte lawng hman nan duh. Hi kongah Biahalawk a ummi cu Lai holh theng te hman dingin Chin Miphin Ni hi Lai Miphun Ni ah maw nan ruah?
Chin National Day/CND tiah mirang ca hman duh bak loin Chin Miphun Ni / CMN tiin Lai caholh thengmang tein hman le tial cu nan duh hoi. Biahalawk cu Lai caholh thengte hman le tial dingin Chin Miphun Ni hi Lai miphun ni ah maw nan rel? Chin a simi paohpaoh i kan Miphun Ni pei a si leh hi. Chin Miphun Ni ti cu Laica men a si.
Laiholh cu Thantlang, Halkha, Falam lawng nih kan hmanmi holh a si. Chinram tlangholh a si rih lo.
Hi bantukin Laica, Lai holh thengmang hman nan duhnak hi Lai holh a thei lomi Matupi, Mindat, Kanpalet, Paletwah lei kan unau hna nih an theih cun CND hman duhnak lung zong an ngei lo kho. A dang tein Chin National Day hna an tuah kho.
Lai pawl lawng hi Chin Miphun Ni a hmangmi le a tuahmi ah i ruat sual hlah u sih. Chin Miphun Ni ah Laiholh lawng hman ding, Laica lawngin tial ding nan ti lenmi hna hi ruat setmat cun ruatnak bit bia tu a si. CMN ah Laiholh thengte hman nan duhnak nih hin Chin National Day cu Lai National Day ah canter nan duh i nan timh ti ko khi a lawhter. Nan miphun dawtning hi nan ruah than a hau lai.
Chin National Day ah zeiholh dah kan hman lai?
CND ah hin mi tam bik nih theih hngalh bikmi Holh kan hman cio hna lai. Chinram ah khan cun nanmah khua holh cio in khan hmang kho ko u law a tha. Kawlram ahcun Kawl holh hmang zongn CND tuah ko u.
US le Ram thumnak lei ahcun mirang holh hmang zongin CND hi kan tuah caan a phan te lai. A ruang cu Lai holh thengte hman dingin Lai Miphun Ni a si lo caah a si. Kawlram le Ramleng lei ahcun Laiholh theng tein CND hman awk a tha lo ti cu a lungfim komi nih cun ruah khawh ding a si.
Hiti ka tial ruangah nan thinhung hlah u. Nihchuak bia ka tial zong a si lo i ni sawh fawn hlah uh. Sullam ngei tein ka tialmi a si.
Satu CHIN 