Miphun daw thenkhat nih cun CNA ah luh hi tha an pek ngai. Miphun dawtnak lungput in an hmuhning a si ve caah a thatuk ko. Nain atu lio CNF sining zoh in cun CNA ah khin kan luh awk zong a si hnga lo tiah ka ruah.
Atu ah hin CNA/F ah kan va lut cun Khuate ah a ummi, a harsa ngaingai mi, bawmchantu le ramdang in tangkaa kuatu zong a ngei lomi chungkhar hna sinah ah va tlun bantuk ceo khi a si hnga i harsatnak kan va pek chih lehlam tu a si hnga. Mah ti ka tial hi CNA/F ka doh a si hrim lo. A ngaingai in ka duhnak bik cu CNA/F ah lut thluahmah hna u sih ti hi a si ko.
CNA khi an harsa tuk. Chin Mipi nih kan dirhkamh lo tuk rih. Chinmi hi miphun le ram dawtnak lungthin a ngei lomi deuh lawngte kan si. Miphun dawtnak kongah thisen a linmi kan tlawm tuk rih. Miphun dawtnak lei ah kan lung zong a fim lo tuk rih.
Miphun Dawtu CNA/F an harsatning hi Youtube bia ruahnak kan zoh cun kan i sum kho lo, nusal le pasal pi zong kan mitthli a tla ruangmang theo an ti.
CNA/F An nun khua sakning ka ruah ah Chinmi lakah nun khuasak a harsabik cu an si ko lai. Miphun le Ram an dawt ruangah khi tluk harsatnak an tuar i an in chih khi ruah ah khuaruahhar a si ko. Upat lo awk an tha lo. Khi hna khi Fim thiamnak a ngeimi nusal tha le pasal tha lawngte an si ko. CNA/F in chuah i kanmah bang Inn tha le motor tha he, rawl thawthaw le meh thawthaw he khua a sa kho ding lawngte an si ko. Asinain kan Chinram le miphun an dawt tuk ruangah harsatnak tu an i thim deuh. An lungput le an lungthin cu uar a um kho dah ngai.
Khrihfa kan si kan ti i kan miphun chung harsami le mi phundang tiangin bawmhchannak hna zongah kan si khawh tawkin kan kut kan samh. Asi nain mah miphun le mah ram caah nuntep in rian a tuanmi mah miphun dawtu CNA/F bawmh cu kan ui tuk rih. Hnu kan chit tak diam ko.
Kan Unau Kachin pawl khi zohchuntlak an si. Kachin Hriamtlai an dirhkamh ning le an bawmhning. Kannih Chinmi vial nih harsatnak tampi huah le Nuntep in miphun le ram caah rian a tuanmi CNA/F kan hei bawmh sian lo ning. A phunphun tu in kan hei soisel hna, kan mawhchiat hna, kan tlanglamh hna. CNF thangchiat zong kan hei i awl ning hi ruah ah ngaihchia lungrawk kan si ko.
Chin mipi kan lungfim cang seh law miphun dawtu CNA/F hi kan si khawh chung in, dongcat loin bawm/dirhkamh chinchin hna u sih….
Satu CHIN 