Mara khua a simi ah Laica cawn le cawn lo kongah MTP nih nawl a ngei maw ti-ah an ngei lem hnga lo. Khuami, Khuanu khuapa nawl a si ko. Nule Pa hna nih Mara kan fale hi Lai holh zong thiam ve hna seh law Lai pawl tluk kho ve hna seh ti an duh cun Laica cu an fale zong an cawnter ko lai. Anmah nawl a si ko. MTP nih an khap kho lo i an nawl zong a si lai lo.
MTP nih Mara khua ah Laica cawn nan khap cu kanmah caah thil ṭha le ṭhahnem santlai a si hlei lai lo. Kanmah le lam te kanmah tein kan i phih bantuk a si lo hmanhah kan fale lam kan phih piak hna a si lai. Ai cei ding cu kanmah Mara theo kha kan si ko lai. Lai pawl an zeite a poi lai lo. Mara miphun ka si ve nakin tutan MTP nan thil tuah cu kan mawhchiat ngaingai hna. Nan Mara miphun dawtning le ṭanhning hi nan ruah ṭhan a hau lai.
Khua pakhat chungah nawl a ngeitu le Fale zawn a ruat biktu, fale hmailei an nun thangcho seh ti a duh sak piak biktu cu mino si loin hringtu an nu le an pa kha an si deuh. A hrinmi a fa thangcho seh, degree tampi zong hmu seh, holh tampi zong thiam seh ti a duh sak piak lomi hringtu nu le pa an um cun bantuk cu a molhmi Nu le Pa an si kan titi hn i Fale Dawt zia a thiam lomi kan ti hnga. An fale an dawtning zong a hmaan lomi a si hnga cu.
Chin state ummi Mara Pawl kan dihlak in Laiholh kan thiam a hau i kan fale zong Laiholh an thiam a hau chinchin. Hmailei ram le Miphun hruainak ah Laiholh zong thiam chih a hau te Lai. Chin upa thim tikah Mara a si cun Laiholh hna a thiam maw? Mirang holh hna a thiam maw ti-in tah le thim a si cu mu.
Mara khua ah Laica cawn a duhmi hna hi Mara miphun tlau seh ti kan duh ruangah a si hrim lo. Kan miphun khat Mara pawl kan dawt ruangah, Mara pawl hi thangcho chin ve u sih, Laimi lakah ningzak loin dir kho u sih, an thiammi holh cu anmah bantukin thiam ve u sih ti kan duh ruangah a si ko.
Mara khua in Thantlang, Hakha lei ah Sianginn kai a rak i thawhmi Mara kan fale pawl cu Lai holh an thiam lo ruangah mi nihsawh le capo saih an tonmi te hna, sianginn ca cawnnak holh kong zongah harnak an tonmi te hna zong a um len. Laiholh kan thiam hlei lo cun Hmailei zongah laklawhnak kan tong len rih ko lai.
Laiholh a thiam lomi Mara tam deuh cu Laiholh zong thiam an duh tuk ko. Anmah te zongin thiam an i zuam sak len ko. Atu bantukin MTP nih thanh ca an chuahmi hi Mara lak ah a duh lo-tu zong keimah telh in an um len ko lai.
Chin state ah kan um cang i Thantlang peng hna kan van si chinchap cang caah kan peng holh a simi Lai holh, Chin state Khuapi holh a simi Lai holh cu thiam i zuam cio ding kan si. Cawn len ding zong kan si ko.
Kan miphun Mara caholh kan dawt i kan tanh zongah Chin miphun lungrualnak le funtomnak a nuarsuan i a hrawktu kan si loding a biapi. Mah miphun dawt le ṭanh zongah a zia thiam a hau. Fimkhur a hau. Cu lo ahcun Tidim pawl bantukin Chin miphun lungrualnak a ṭhencheutu kan si ve hnik ko lai.
Mara Miphun kong le caholh kong vun ceih hin cun Mara pawl hi thinhung tlorh in thinhun kan hmang. Lai pawl cu ral zoh in kan zoh colh hna. Hi ca ka ṭial ruang zongah nan ka huat manh hoi cang theo lai. Nan thin zong a hung hoi cang theo lai. Thinhun awk a si lo. pawl hi caholh kong le miphun kongah cun kan lungput hrim hi a rak chia rengreng ko rua. Miphun kongah adik lomi le a ṭha lomi lungput hi hlaw u sih law a ṭha deuhmi lungput keng hna u sih.
Hiti ka ṭial ruangah nan thin rak hung lai u ci. Mara ka sinak le ka miphun khat Mara miphun dawtnak he ka hmuhning ka ṭial ve bia si. Mara miphun dawtu ka si na ti cun kei zong ka si ve ko.
Satu CHIN 