Zerusalem sarthlan Kolkattha cu a min hmanh ah Luruh hmun ti va si kaw, ni dang ahcun, king rengruang in a um, zanlei caan hawi ahcun, minung cu vun chim lo, uifir hmanh amah lawng cun a ning a ṭi hnga.
Asinain nihin cu rel cawk lo minung an khat dah ngai! Chun nilin lingte asi i, huthut in a sa. Zapi nih vun phanh khawh awk loin, Rome ralkap nih an kulhmi, lung hrelhhrolh lakah, Jesuh le mifir pahnih hna cu an dir. An liang an leh hna i, ralkap nih an hnulei in an tlaih hna.
Jesuh le mifir pahnih hna cu an thil an phoih hna i, an taklawng in niliin ah zoh tlak loin an dir. An hmaika ah vailam thing pathum an chiah. Hling luchun hramhram in an rak chinh lio ah, a lu hmun tampi ah a pem i a thi le a thlan in a hma vialte a ṭial dih. Tho nih an tlanh. Vun phen hainak kut zong cu a um ti fawn lo.
Vailam thing ahcun, ih an fial hna i, mifir pahnih hna cu an cawl, an ai, an kio. Ralkap nih an chuih, an lamh hna. Holh phun chia kip in an auh hna. Jesuh tu cu, tufa te bang, amah ih in a it i, sersiam hau loin a za a zam. A keh lei mifir pa cu thir an khenh hmasa. A kio le a rak thawng cu mithla-kawk an bar ko. Minung aw hmanh a lo lo.
Jesuh nu, Mari Makdalin le an hawi le hna cu mi karlak ah an det chih hna i, Jesuh pum zong cu an hun hmu kho lo. Mifir pa ai le hram an vun theih ahcun, an chung ril aa let. A theih an ngamh lo. Jesuh nu cu, mei kang hma cheem bantuk khin a thaw in, ‘a ka fa’ tiah a ti lengmang.
Jesuh cu, a za phah piak cia ahcun, thir khenh hngete ngaw hi an vun hmuah i, hmakhat an vun khenh ahcun, titsa hrat cu thawng a ngei lo, ‘cuk’ a ti. A fah maw thei lo sual lai ti bang, kut hnihhnih in an vun khenh chap. A mit a sur, a kam aa seh i, awn au lo tein a in. A kut khat lei cu an vun khenh ṭhan. A fah tuk caah, a thaw chuah a suk in aa su.
A kut a dih cun a ke hnih in thir khenh ngan chinchin in, an vun khenh. A nu le nih cun, sobul thawng lawng an theih. An hna an i phih, an ngai ngam lo. Mifir pakhat cu an vun ti ve i, ralkap pali nih an tlaih bu hmanh cun, fawi bai ah an khenh kho lo.
Vailam thing cu an vun tun hna. Ai, zoh ngam a ti lo. Jesuh kut le kut cun thi, a dordor in a tla. A ke thi cu, tidong hlung luan in a luang.
A nganfah a celh lo i, a hngawng a mer lengmang. A nu nih voikhat te a hun zoh i, a ṭih tuk ah, raihrang therh in a therh. Mari Makdalin cu siksek in a ṭap. Jesuh nau hniang Saiman vun zoh ko ah, lung a fak. A mitthli kurkur in a luang. A kam a seh, a kut a tum, a samh, a tum, a samh. An hna hram in tlangbawi le cathiam hna nih, “Zudah siangpahrang ka si na hei ti. Mi na khamh hna ah vun i khamh ngat” tiah cil an hei chak, an nih a chuak na lo cun, an i nih ter. Saiman cu a thin hun a celh lo. A pawng bik i a dirmi tlangbawi cu vun zuan hnawh a zalh i, a nu nih a mit aw cu vun hmu kaw, ‘ka fa te’ tiah a tlaih.
Mah ti Jesuh nganfah i ai ngerh len lio ahcun, a kehlei mifir pa nih, “Hei! Nazaret mipa, Khrih ka si na ti lo mei, vun i khamh tuah. Kanmah zong hi vun kan khamh chih tuah” tiah a ti pah, ai! tiah a ai pah. Khatlei ummi pa nih, “Maw, mifir ṭha lo, na thih cuahmah lio hmanh ah Pathian na ṭih hin lo mu. Kan sualnak man kan in hi na hngal lo maw? Kanmah bantuk sualnak ngei ah dara na ruah hi” tiah thin hung ngai in a vun ti.
Jesuh lei a hoih i, “Jesuh, na Pennak na phak tikah, kei misual hi vun ka philh hlah mu” tiah mitthli he a vun ti. Jesuh nih a celh na loin, a hmai a vun i panh i, “Bawi ngaite kan chimh, keimah he Paradise ah na um lai” tiah a hna a vun ngamter.
Mifir pa cu a lunglomh tukah a lung a hno chin i, a ṭah pah in, “Ka Bawipa, ka nun chung vialte ka lung retheihnak cu, thilrit bang a tla cang. Hi ti thih zong hi ka fahter ti lo” tiah a ti.
Mah hi mifir hna he an i chonh cu a lang in an hun hmuh nain, zeibai an chim cu an thei lo. Nganfah nem deuhnak ah tiah ralkap nih sii phunkhat an vun chanh hna. Jesuh cu a ding duh lo. A nu nih a um nakin, ‘Ding hen ka fa’ tiah a rak ti lengmang. Hramhram in mi an keu hna i, vailam thing cu an hun naih deuh.
Jesuh nih a mit a vun leh i, a nu le Zerusalem khuami Zan nih a dir pi hna kha a vun hmuh hna. A nu cu a vun zoh i theih ual theilo ual khin “Zoh hmanh na fapa kha” tiah a ti. Zan cu a vun zoh ve i, “Zoh hmanh na nu kha” tiah a ti ve ṭhiamṭhiam.
Mah ti cun zoh ngam lo nganfak in, ni her sang tiang a um. “Ka ti a hal” tiah a ti i, ralkap nih fung ah puan chia an men an men i, mah puanchia par cu mitsurhang thor an hnim i, “Heh, tikik te hi ding tuah” tiah a ka ah an hun tuh.
Cun suimilam pathum hrawng ah cun, a thi chuah cu a zia deuh. Asinain, a hma tho nih an tlanh i, sivang hin in, an tuah. Nilinh zong cu a dai hlei lo. Mari Makdalin nih Jesuh hmai cu a zoh ngam lo. Vak tiah voi khatkhat a hei zoh tawn i, a mit a chinh ṭhan ṭheu. A mitthli tam tuk a tlak cang caah a mit vialte a phing dih. A lung chung cu a ṭap zungzal ṭhiamṭthiam.
Khua a phunphun a ruat. Jesuh a nun lio i, “Na sualnak cu ngaihthiam asi cang” tiah a rak ti. A lung lomh tuk i a mitthli a rak tlak. Jesuh ke cung i a rak tlak sual i, a sam i a rak hnawh piak hawi kha a vun thei. Vailam thing cu a hei zoh ṭhan i, awk filfial in a nganfah mah tluk a ti na, ka khatte hmanh holh phun chia a vun chim lo. Hnahno ziik vun khiah, hmal, le par corhno vun hmeh bang, uai hninghniang in. Ka thin, maw ka sian lo a vun ti lio ah khin, Jesuh orhlei ke, thir an khenhnak hma in thi thar bawhlawhlok tiah a hung chuak i, a titsa vialte a caang dih.
Nunnem sualnak ngei lo, mitcaw, kebai damtertu, sifak michia le mi thurhnawm dawtu, mi zoh tlak loin lainawng bang an in tar mu, tlangbawi rual nih cun, tiah a lung in a ti. Mah ahcun, Jesuh cu a nganfah a hung zual i, ai ngerh lengmang. A hun zoh ah, a chungril vialte, aa let dih. “Ka zoh ngam lo, ka zoh ngam lo” a ti i, hnulei a chit.
Ka zoh ngam lo an hliamnak hma liangluang,
Mi sa-ei pawpi le cakei hrang an si kun lo,
Duh in an in ṭuan maw, hnahte no hninghiang.
Van arfi tengtung le hnahchawl zat lo,
Siing le za in an rel cawk hnga maw na van ralkap,
Vung chim hna law, Maikhel le a mi rual cu.
Kai-a-fas le a tlangbawi rual hna cu,
Abrahma le Issac fa Khamhtu kan hngak an ti ṭung,
An rut mitmu cu vun khoih lang ka tin zum hin.
Thiang chin hmun an kai ah puan rang ti hna,
An fir khut le sualza an hleih pei an huh rua,
Ka ning an zak langta le thlan rangrual.
Ka zai ti lai lo Vabawifa ka ṭa,
Lung a nem cu ṭhachin vulei ro na ti lo mei,
Cungchin Vankhua theih lo lem si hna hlah.
Mah ti Mari Makdalin a lungfah le a thinhun lio ahcun, Jesuh cu a sifah a celh ti lo i, “Eloi, Eloi; Lema Sabakthani, ka Pathian, zeicahdah na ka kal tak” tiah a ai ruangmang. Jesuh nganfah ai-hram nihcun a orhlei mifir pa ngaih a chiatter tuk i, “Bawipa” tiah a vun zoh ahcun, Jesuh nih, “A dih cang” a ti i a thi.
Jesuh thih cangka te cun, dutdet dutdet tiah khuadawm nak tlang pipi an hung zaam i, khua a mui chupmap. Cunglei in lul-lul-lul tiah khuari a tor. Lam nai tete ah teek an tla. Puppep puppep tiah ruah fang ngan pipi a tla i, hmakhat te ah kuang ti thlet in a vun i thle. Ṭotho chim awk ṭha lo a hrual in a vun i hrual. Lii aa hnin ciam mam i, kumkhua caang ti lo, lung vei tiatia, kurulh-kurulh tiah an caang i, vulei tlerh in an ril.
Mitṭhep kar ah luti cu a vo in an i vo. Lei a min i, thing ngan pipi hoi hna an hram ning pi in tlangpang ah an tolh zuahmah. Liihnin ah thlan ṭhing an kuai i, luruh ro an mitkuak pipi le an hani huh lo hawi hna luti nih a vun fenh hna. Khuamui lak ahcun, thinghreng ṭe bantuk ṭeek an i kap. Mimthlau aa lek. Mah bantuk ruah le thli cu vulei cug ah a um bal lo.
Van le vulei an thin a hung. Ṭeek nih an tlakmi paoh mal cikcek in an hmal hna. Thlitu a ai in an ai. Mi hna cu an ning a ṭi. Ai! an ti i, an zam. Khua a muih dih caah lam kalnak an hmu lo. Pakhat le pakhat an i pah, an ril. Jesuh nu le a hawi le rual cu anmah lawngte an zamtak hna. Vailamthing cu an hun naih i, Jesuh toi teah an dir.
“Hrang Nawl kong hna cu zeiti an hei ṭial zongah, ka zei a poi lo. Jesuh Khamhnak a hmaan lo ning i cawnpiak le kalpi tu hi ka huat bikmi le ka ṭih bikmi a si” Miroling Hrang Nawl
Ka zahpi lo cauk chung ta lak chinmi a si.
Satu CHIN 