Chinmi Nu le Pa tam deuh hi Fale chimhhrin cawnpiak zia kan thiam lem hna lo. Ngakchia, Fa le cu Dawtnak he Nem tein Chimhrin cawnpiak hna ding an si.
Ka hmuh tonmi ah Chinmi Nule Pa hna nih an Fa le an chimhhrin tikah Dawtnak he bia nem tein chimhrin cawnpiak ti cu ka hmu tawn lo. Thinhunnak seikhat tu he an fale hrangpi in an chimhhrin hna, an hro hna i fung he an tuk pah hna tu hi ka hmuh theih deuh.
Fale sik len, ruru hranghrangpi in hro, hrangpi in au hnawh i fung in tuk pah, kut in bengh pah, thil bahnak Chaih in tuk pah i fale thinhunter, fale taksa fahter i rakter len le tahter len hi Chinmi nu le pa hna nih kan Fa le kan chimhhrin hna i kan cawnpiak hna ning cu a si.
Bantuk cu — –
– fale Cawnpiak zia thiam lo a si ko.
-Fale an taksa an fahter men hna a si.
-A Lungfim rih lomi Fa le an thin an hunter men hna a si.
-An in an puanter men hna a si.
Chinmi Fa le chimhhrin cawnpiak dan cu Thinhunbu le ruru hrangpi a si tawn caah Fa le nih cun a kan dawt caah tihin a kan cawnpiak tiah an ruat lem lai lo. Ruru hranghrang pi chimhhrin cu Dawt ruangah chimhhrin zong a lo fom lo cu ta. Hrangpi in fa le an chimhrin hna ruangah fa le nih nu le pa kha a tih in an tih hna. An ngamh hna lo.Ngakchia, fale taksa fahter hi a tha lo ngaimi a si. Ngakchia nih an duh bak lomi le an tih bakmi a si.
Ka ngakchiat lioah Ka nu nih fungfek in ka taksa fak dih le phing dih in a rak ka chaih kha keimah le keimah i thah duhnak lung tiang a rak chuak. A ka dawt ruangah a ka chaih a si tiin ka rak ruat kho lo. Langhter duhmi cu Chinmi hi Fale chimhhrin cawnpiak zia kan rak thiam lo ti kha a si ko.
Ram thumnak ahcun Fale hi Mi phundang he cawh thup in an um caah Chinmi lungput zong an keng tuk lem lo kho. Fale nih thil pakhatkhat ruangah nu le pa hna Palek sin an report i thong hna an thlak sual hna ahcun Fale lawng mawhchiat awk an si lai lo. Nule Pa hna hrim hi Ram thumnak sining hoih in Fale chimhhrin cawnpiak zia an thiam ve lo caah mawhchiat awk ngai an si ve lai.
Mirang pawl cu an fa le hi nem tein dawtnak tein an chimhhrin tawn hna. Fungfek he kut thlak hau loin bia nem tein an cawnpiak khawh tuk hna. An fale cungah an lung a sau. An fale kha an hmaizah hna. Mah cu a takin hmuh khawh a si i youtube video zongah hmuh awk a um len.
Chinmi cu kan Fale hmaizah kan thei hna lo. Kan Fale cungah kan thin a tawi tuk. Kan lung a sau lo.
Chinmi Hringtu Nu le Pa hna, Nan fa le kha thinhunbu le hrangpi in nan cawnpiakmi hna nakin dawtnak he nemte in nan chimhhrin nan cawnpiak hna ah a tha deuh lai. Thinhun buin na chimhhrin hna cun nan kut nan thlak hnawh colh men ko hna lai. Fale Thinhun bu pi le ruru hranghrang in chimhhrin cawnpiak cu theipar thalo zunnak a si kho.
Ram thumnak ah khua a sami Nu le Pa tam deuh cu fimthiamnak le catang zong a ngei lomi an si hna tika nu le pa hna nih an Fale cungah ruahchannak tampi chiah cio a si. Fale hi Hmailei an van upat tikah Chungkhar nih siseh, Miphun nih si seh, bochan te ding an si. Cucaah nu le pa hna nih nan fa le an ngakchiat lioah thinhun bu he chimhhrin loin dawtnak he nem tein chimhhrin cawnpiak i zuam cio hna u. Nan fale cungah nan lungsau u, nan fale kha hmaizah hna u, Cucu Pathian duhmi zong a si..
By- Satu Kmc( Bawihrin Sang )
Satu CHIN 